Ҷашни Артиши миллӣ муборак ҳамватанони гиромӣ!
23 феврал дар таърихи давлатдории навини тоҷикон ҳамчун Рӯзи Артиши миллӣ бо эҳтироми хосса таҷлил мегардад. Ин сана рамзи шуҷоат, садоқат ва ҳифзи арзишҳои муқаддаси Ватан буда, ба таъсис ва таҳкими Қувваҳои Мусаллаҳи Ҷумҳурии Тоҷикистон иртиботи ногусастанӣ дорад. Артиши миллӣ ҳамчун сипари боэътимоди давлату миллат, амнияту субот ва истиқлолияти кишварро ҳимоя менамояд ва дар ҳифзи оромии ҷомеа нақши сарнавиштсоз мебозад.
Таъсиси Артиши миллӣ ба марҳилаи ҳассоси таърихӣ рост омад, зеро он замон давлатдории тоҷикон ба таҳкими пояҳои худ ниёз дошт. Дар шароити душвори сиёсиву иқтисодӣ, ки ҷомеа давраи гузаришро аз сар мегузаронд, зарурати таъсиси неруи мутамаркази мудофиавӣ ба миён омад. Маҳз дар ҳамин марҳила заминаҳои ҳуқуқӣ, сохторӣ ва ташкилӣ гузошта шуданд, ки имрӯз пояи устувори артиши касбӣ ва муосирро ташкил медиҳанд.
Такрор ҳам шавад бозиқайд менамоям, ки Артиши миллӣ аз рӯзҳои аввали таъсисёбӣ рисолати муқаддаси ҳифзи истиқлолият, тамомияти арзӣ ва амнияти шаҳрвандонро бар дӯш гирифт. Ин рисолат на танҳо вазифаи хизматӣ, балки қарзи виҷдонӣ ва масъулияти таърихии ҳар як хизматчии ҳарбӣ мебошад.
Имрӯз Артиши миллӣ на танҳо як сохтори низомӣ, балки мактаби ҷасорату мардонагӣ барои ҷавонон аст. Хизмат дар сафи Қувваҳои Мусаллаҳ барои ҳар як ҷавони ватандӯст мояи ифтихор буда, эҳсоси масъулиятшиносӣ, худшиносии миллӣ ва эҳтиром ба муқаддасоти давлатиро тақвият мебахшад. Мактаби хизмати ҳарбӣ ҷавононро дар рӯҳияи садоқат ба Ватан, итоат ба қонун ва эҳтиром ба арзишҳои миллӣ тарбия менамояд.
Маврид ба ёдоварист, ки солҳои истиқлолият бо дастгирии Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон инфрасохтори низомӣ рушд ёфт. Бунёди шаҳракҳои ҳарбӣ, таъмиру таҷдиди қисмҳо, таъсиси муассисаҳои таълимии ҳарбӣ ва фароҳам овардани шароити мусоиди хизмат барои афсарону сарбозон далели таваҷҷуҳи махсус ба соҳаи мудофиа мебошад. Ин тадбирҳо ба болоравии сатҳи интизом, касбият ва омодагии ҷангии неруҳо мусоидат намуданд.
Иштирок дар машқҳои муштарак, мубодилаи таҷриба ва омӯзиши технологияҳои муосири ҳарбӣ имконият фароҳам меорад, ки сатҳи омодагии ҷангӣ мутобиқ ба талаботи замон нигоҳ дошта шавад.
Яке аз самтҳои муҳими фаъолияти неруҳои мусаллаҳ тарбияи ҳарбӣ-ватандӯстии ҷавонон мебошад.
Дар ин рӯзи фархунда, ҳар фарди кишвар бо эҳсоси баланди миллӣ аз Артиши худ ёд мекунад. Зеро неруҳои мусаллаҳ ҳамчун сипари боэътимоди давлат, рамзи шуҷоат, мардонагӣ ва посдори арзишҳои истиқлолият, сулҳ ва ваҳдати миллӣ боқӣ монда, дар роҳи ҳифзи манфиатҳои миллат содиқона хизмат менамоянд.
Ба муносибати Рӯзи Артиши миллӣ тамоми афсарону сарбозони шуҷои Қувваҳои Мусаллаҳи Ҷумҳурии Тоҷикистон ва собиқадорону устодони соҳаи мудофиаро самимона табрик менамоям. Ба ҳар яки онҳо саломатии бардавом, иродаи қавӣ, рӯҳияи шикастнопазир ва дар иҷрои рисолати муқаддаси ҳифзи марзу буми Ватан барору комёбиҳо орзумандам. Бигзор осмони Ҷумҳурии Тоҷикистон ҳамеша софу беғубор бошад ва сулҳу субот, ваҳдати миллӣ ва оромӣ дар сарзамини азизамон пойдор монад.
Бо эҳтироми хос, директори КВД “МСКХСН” Саидзода С.С.
