Президенти Ҷумҳурии Тоҷикистон, Раиси Ҳукумати Ҷумҳурии Тоҷикистон муҳтарам Эмомали Раҳмон дар маҷлиси васеи Ҳукумати Ҷумҳурии Тоҷикистон, ки 17 январ дар бинои Ҳукумати Ҷумҳурии Тоҷикистон баргузор гардид, ба вазорату идораҳо супориш доданд, ки ба масъалаҳои ташаккули «иқтисоди сабз», раванди рақамикунонии соҳаҳои иқтисоди миллӣ ва вусъат додани ҳисоббаробаркуниҳои ғайринақдӣ диққати аввалиндараҷа диҳанд.
Дар маҷлиси васеи Ҳукумати Ҷумҳурии Тоҷикистон натиҷаҳои рушди иҷтимоию иқтисодии кишвар дар соли 2024 муфассал баррасӣ гардида, вазифаҳои асосӣ барои соли 2025 муайян карда шуданд.
Дар маҷлис саравввал ҳисоботи Сарвазири кишвар Қоҳир Расулзода оид ба натиҷаҳои рушди иқтисодию иҷтимоӣ дар соли 2024 шунида шуд. Гуфта шуд, соли 2024 дар ҳаёти сиёсию иқтисодии кишвар як қатор пешравиҳои назарраси иҷтимоию иқтисодӣ ба даст омаданд.
«Дар натиҷаи татбиқи сиёсати хирадмандона ва дурбинонаи Президенти кишвар рушди иқтисодиёт дар сатҳи устувор нигоҳ дошта шуд», – изҳор дошт Сарвазири мамлакат.
Ба гуфтаи ӯ, дар давраи ҳисоботӣ ҳаҷми маҷмӯи маҳсулоти дохилӣ ба 154,3 млрд. сомонӣ баробар гардид, ки нисбат ба соли 2023 ба андозаи 22,6 млрд. сомонӣ зиёд мебошад.
Таваррум дар сатҳи 3,6 фоиз нигоҳ дошта шуд, ки ин нишондиҳанда нисбат ба як соли пеш 0,2 банди фоизӣ кам мебошад.
Соли гузашта нақшаи қисми умумии даромади буҷети давлатӣ иҷро гардида, воридоти маблағҳо ба буҷет 46,9 млрд. сомониро ташкил дод, ки нисбат ба нақшаи пешбинишуда 1,8 млрд. сомонӣ зиёд мебошад.
Сипас роҳбарони як қатор вазорату идораҳо, аз ҷумла Раиси Бонки миллӣ, Прокурори генералӣ, вазирони молия, рушди иқтисод ва савдо, энергетика, нақлиёт, кишоварзӣ, саноат ва технологияҳои нав, Раиси Кумитаи давлатии сармоягузорӣ ва идораи амволи давлатӣ, Директори Агентии назорати давлатии молиявӣ ва мубориза бо коррупсия, Раиси палатаи ҳисоб, Раиси Кумитаи андоз, Сардори Хадамоти гумрук, Директори Агенгтии суғуртаи иҷтимоӣ ва нафақа¸ раисони шаҳри Душанбе, ВМКБ, вилоятҳои Хатлон ва Суғд ва дигарон аз фаъолияти солона дар қаламрав ва соҳаҳои зери назораташон гузориш доданд.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маҷлиси васеи Ҳукумати Ҷумҳурии Тоҷикистон оид ба натиҷаҳои рушди иқтисодиву иҷтимоии кишвар дар соли 2024 бо таҳлилҳо суханронӣ намуданд.
Сарвари давлат муҳтарам Эмомалӣ Раҳмон Ҳукумати кишвар, вазорату идораҳо ва мақомоти иҷроияи маҳаллии ҳокимияти давлатиро муваззаф намуданд, ки фаъолияти худро вусъат бахшида, суръати рушди иқтисоди кишварро дар соли 2025 дар сатҳи на кам аз 8 фоиз таъмин намоянд.
Супориш дода шуд, ки дар ин ҷода, хусусан, ба масъалаҳои ташаккули «иқтисоди сабз», суръат бахшидани раванди рақамикунонии соҳаҳои иқтисоди миллӣ ва вусъат додани ҳисоббаробаркуниҳои ғайринақдӣ диққати аввалиндараҷа дода шавад.